Sunday 21 August 2011

إنت عايز إيه بالضبط؟؟

إنت عايز إيه؟ عايش ليه؟ كمالة عدد يعني ولا ليك لزمة؟؟ لا مؤاخذه، أنا مقصدش اغلط في حد ولا حاجة..ده بس سؤال بتسألهوني نفسي كل فترة لما بتلاقيني عايشة في الدنيا زيي زي الكرسي اللي أنا قاعدة عليه (و يمكن الكرسي يعرف يرد أحسن مني لأن هو على الأقل الهدف من إستخدامه معروف و مستسلم لكل من أراد الإستفادة منه). إنما صحيح؟ هو إحنا عايزين إيه؟ عايزين إيه من الدنيا؟ بنصحى الصبح ليه؟ عشان هي الحياة كدة؟ ولا عشان نفطر الراجل و العيال؟ ولا عشان ننزل نجيب لقمة العيش (اللي منها العيال هيفطروا!) أنا مش بقلل من الهدف السامي ده والله، أنا بس بتسائل..هو ده كل اللي بيقومنا من السرير كل يوم؟ همم..طب ما عشان كده نصنا بيقوم مش طايق نفسه و النص التاني بيقوم مش طايق اللي جنبه! لو هو ده كل الهدف من الحياة يبقى طبعا دي عيشة تقرف. أصل إحنا لما ربنا خلقنا مخلقناش عشان كده فطبيعي لازم نحس إننا مش عايشين لأننا فعلا مش عايشين..مش عايشين زي ما إتخلقنا عشان نعيش فدايما جوانا صراع و خناقة. لقمة العيش اللي إحنا كلنا مفحوتين عشانها و مبنفكرش غير فيها دي ربنا عملهالنا عشان تبقى وسيلة نعيش بيها، مش هدف نعيش عشانه. إحنا بقينا على طول تعبانين لما خلينا لقمة العيش هي الهدف الأساسي و إن ماكانش الوحيد في حياتنا. لإن ده سباق ملهوش خط نهاية غير الموت (ربنا يديكوا طولة العمر طبعا، أنا بس أصلي صريحة و دغري حبتين). طبعا فيه ناس هتقول "طب و متطلبات الحياة و طلبات العيال و المصاريف و و و؟" طب مفكرتش إن إنت اللي تقلل من طلباتك شوية؟ و تعلم ولادك يعيشوا على قد اللي معاكم؟ مش لازم يبقى دايما بيغيروا الموبايل ولا اللابتوب كل ما أصحابهم يغيروا ولا كل ما ينزل واحد جديد في السوق..مش يمكن إحنا اللي ماتعلمناش نقول "لأ" لنفسنا و أولادنا فالنتيجة إن نفسنا و أولادنا بقوا مدلعين؟ فربنا شال البركة من حياتنا لإننا مبقاش عندنا رضا عن أي حاجة بيديهالنا. و طبعا بقينا بنصحى كل يوم بنفكر إزاي هنجيب فلوس أكثر عشان نلبي الطلبات اللي مش بتخلص. و اللي بتيجي قدامه فرصة – أو زي ما بيقولوا "سبوبة" – إنه يعمل قرشين زيادة طبعا مش هيقول لأ، على الرغم من إنه ده هياخذ من وقته مع أسرته و بيته..بس معلش ماهو هيعوضهم بالفلوس و يجيلهم اللي هما عاوزينه...مش كده؟ للأسف لأ، هو بصراحة مش كده..لإن التطور الطبيعي للبيت اللي بالشكل ده إن الأب بيتحول من راعي الأسرة و قائدها إلى ماكينة ATM و بيبقى أهم حاجة إن بابا بيجيب فلوس عشان ماما تجيب لبس و حاجات حلوة و العيال يجيبوا الإكس بوكس الجديد "الجامد جدي" اللي كل أصحابهم جايبينه و طبعا ميمنعش إن بابا هيجيب لنفسه كام حاجة حلوة أمال يعني هيتعب و في الآخر يطلع من المولد بلا حمص! و تعدي السنين و العيال يكبروا و الأب يبتدي يكبر في السن و العيال إعتمدوا على نفسهم و كل واحد ماشاء الله بيشتغل و يجيب لنفسه اللي هو نفسه فيه..بس الأب إبتدى يحس إنه محتاج لأولاده، و أيام العمر معدودة و نفسه و منى عينه إن حد فيهم يرفع سماعة التليفون يسأل عليه. أصلهم مشغولين شوية، ما هي الحياة كده هنعمل إيه..بس هو محتاج حد يراعيه و يزوره. مش مشكلة، هنجبله حد يقعد معاه أو هناخذه دار مسنين يعتنوا بيه. مش كله بالفلوس؟ أصل هما معندهمش وقت، زي ما هو مكانش عنده وقت زمان يقعد معاهم عشان بيجيب فلوس..عشان هو معرفش يقولهم "لأ" و معرفش يقول لنفسه "لأ" "لأ أنا هاعيش على قد اللي معايا و ربنا يرزقني إن شاء الله، بس ما آخدش من وقتي مع أهلي و أسرتي..و أهم من ده كله ما آخدش من وقتي مع ربنا". يمكن لو علمنا نفسنا نرضى بالرزق اللي ربنا كتبهلنا طالما إننا متأكدين إننا بنسعى و بنشتغل عشان نحصل على الرزق ده، و لو شيلنا قلبنا من الدنيا شوية و بطلنا نجري ورا الأحسن و الأغلى و اللي عنده و اللي معندوش يمكن ساعتها نحس بالبركة و نلاقي فلوسنا بتكفي إحتياجاتنا و زيادة كمان، و ميبقاش همّنا الوحيد في الحياة هو زيادة دخلنا و نلاقي وقت لأولادنا و أزواجنا و أهلنا و لربنا، و نلاقي وقت كمان لبلدنا نعمل فيها أي حاجة إن شالله نساعد طفل أو عجوز يعدي الشارع على أمل إن البلد دي ترجعلها أخلاقها الجميلة الإنسانية اللي كل الناس بتبكي على إختفائها و بتببه بإن الحياة بقت صعبة و متعبة و محدش بقى في نفس يقول "آسف" و "عن إذنك" و "شكرا" و "إتفضل"، الأخلاق اللي دول كثيرة زي اليابان و تايلاند و ماليزيا عايشين بيها كل يوم عادي و مش بيستغربوا و يرجعوا يحكوا للناس كلها إن "تخيلوا فيه واحد إنهارده وقفلي عشان أعدي الشارع مع إن الشارع كان زحمة!" أو مثلا "تصدقوا واحد لما خبط فيه إنهارده في الشارع وقف عشان يعتذر" زي ما إحنا بنعمل هنا و نبقى مش مصدقين نفسنا لما يحصل معنا و نتنهد و نقول والله البلد لسه فيها خير!! ملخص الرغي ده كله، أنا هقولكم على وصفة متجربة من ناس كتير و أقدر أقول إنهم أسعد الناس على وش الأرض، المعادلة دي لو حققتوها هتبقوا إنتم كمان إن شاء الله من أسعد الناس دنيا و آخر

إجتهاد و أمانة و إتقان في العمل  + رضى حقيقي باللي ربنا قسمهلنا من الرزق  +  ترويض للنفس و تربية حقيقية للأولاد على الرضى بالمكتوب  = سعادة و راحة بال في الدنيا و الآخرة و أبواب رزق بتفتح من حيث لا تحتسبوا.

بس كده..و تصبحوا على خير أنا هاموت و أنام من ساعة!!

1 comment:

  1. iLove it!!!!

    bas 2eb2y wasa3y showaya bean el sotoor 3shan ne3raf ne2ra kowayes :D wala anadeelek Maha Fathi??!! :p lolz

    Keep writing .. plz plz plz <3

    ReplyDelete

Can't WAIT to read your comments ;)